प्रतिनिधिसभा बैठकः प्रधानमन्त्री ओलीसँग पूर्वअर्थमन्त्री पुनको भनाभन

काठमाडौं । प्रधानमन्त्री केपी शर्मा ओलीले प्रतिनिधिसभामा बोल्दै गर्दा नेकपा (माओवादी केन्द्र)का उपमहासचिव एवं निवर्तमान अर्थमन्त्री वर्षमान पुनले नियमापत्ति गरेका छन् । सोमबारको बैठकमा प्रधानमन्त्रीसँग प्रश्नोत्तर कार्यक्रम राखिएको थियो । आकस्मिक र शून्य समयको कार्यक्रम सकिएपछि निर्धारित समयभन्दा ढिलो गरी प्रश्नोत्तर सुरु भयो । सत्तारूढ नेपाली कांग्रेसका सांसद धनराज गुरुङले प्रधानमन्त्री ओलीलाई पहिलो प्रश्न राखेका थिए ।

उनले आर्थिक वर्ष २०८१–८२ को बजेटमा तत्कालीन अर्थमन्त्री पुनले अघि सारेको गण्डकी त्रिभुज आयोजना महत्वपूर्ण रहेको भन्दै त्यसको कार्यान्वयन कहिलेदेखि सुरु हुने र कहिले अन्त्य गर्ने सरकारको योजना रहेको छ भन्ने प्रश्न गरे । यस्तै, आर्थिक अवस्था सुधारका लागि आर्थिक गैरकानुनी कारोबार नियन्त्रण गर्ने सरकारको योजना के छ भन्ने गुरुङको दोस्रो प्रश्न थियो ।