अलपत्र हुलाकी सडक, मर्कामा नागरिक

हुलाकी सडकअन्तर्गत बाँके र दाङका बिचमा करिब ३५ किलोमिटर खण्ड अधुरो छ। नेपालगन्जदेखि बाँकेको राप्ती सोनारी–३ नारायणपुर र दाङको देउखुरीस्थित राजपुर गाउँपालिकासम्म सडक निर्माण भए पनि बाँकी खण्ड विस्तारको काम रोकिएको छ । राष्ट्रिय सडक सञ्जालसँग अहिलेसम्म नजोडिएका राप्तीपारिका स्थानीय यही हुलाकी सडक विस्तार हुने प्रतीक्षामा छन् । सडक सञ्जालको पहुँच नहुँदा यहाँका नागरिकले राप्ती नदीमा हरेक वर्ष डुंगा र झोलुंगे पुलबाट वारपार गर्नुपर्छ । राप्तीपारि क्षेत्रमा भरपर्दो सडक निर्माण नहुँदा यहाँका स्थानीय घण्टौं समय पैदल हिँडेर गन्तव्यमा पुग्ने गर्छन्।

स्थानीयका अनुसार चुनावको समयमा उम्मेदवारहरू राप्तीपारिका गाउँमा पुगेर सडक र राप्ती नदीमा पक्की पुल बनाइदिने आश्वासन बाँड्छन्, चुनाव सकिएपछि जितेर गएका उम्मेदवार कहिल्यै फर्किंदैनन् । ‘हुलाकी सडक कहिले बन्ने हो केही थाहा छैन, सडक राम्रो नहुँदा यहाँ अटोरिक्सासमेत चल्न सक्दैनन्,’ राप्ती सोनारी–१ चुनाहा गाउँकी गीता खड्काले नागरिकसँग भनिन्, ‘हाम्रो गाउँदेखि झोलुंगे पुल रहेको भवानीयापुर गाउँमा पुग्न डेढ घण्टा र बर्दापुरको झोलुंगे पुलमा पुग्न एक घण्टाजति पैदल हिँड्नुपर्छ । झोलुंगे पुलबाहेक पूर्व–पश्चिम महेन्द्र राजमार्गमा पुग्न अर्को विकल्प भनेकै डुंगा हो।’