सिकलसेल रोग : गाउँघरमै शिविर सञ्चालन

विशेष गरी थारू समुदायमा बढी मात्रामा देखिने गरेको सिकलसेल एनिमिया रोगको पहिचानका लागि घोराही उपमहानगरपालिकाले परीक्षण शिविर सञ्चालन गरेको छ । घोराहीको नारायणपुरस्थित सिद्धरत्ननाथ माध्यमिक विद्यालयमा आयोजना गरिएको शिविरमा सो रोगको परीक्षण गराएकी १३ वर्षीय उर्मिला चौधरीले रोगबारे जानकारी भएपछि आफू ढुक्क हुने बताउनुभयो ।

उहाँ जस्तै शिविरमा आफ्ना श्रीमान्लाई साथ लिएर आएकी घोराही उपमहानगरपालिका–११, चाघु निवासी कुमारी चौधरीले परीक्षण गराउनुभएको छ । तीन वर्षअघि हातखुट्टा दुख्ने र अत्यधिक थकान महसुस हुन थालेपछि उपचारका लागि घोराहीको बुद्ध अस्पताल पुगेको र त्यहाँ उपचार सम्भव नभएपछि कोहलपुर हुँदै भारतसम्म उपचारका लागि धाउनु परेको बताउनुभयो । अन्ततः काठमाडौँको त्रिवि शिक्षण अस्पतालमा उपचार गराउँदा सिकलसेल एनिमिया भएको पुष्टि भएपछि उहाँ अहिले नियमित उपचारसँगै शरीरमा रगत चढाउँदै आउनुभएको छ ।

उहाँले भन्नुभयो, “पहिले जाँच गर्ने सुविधा नहुँदा रोग पहिचानका लागि धेरै ठाउँ धाउँदा धेरै दुःख पाइयो । अहिले नजिकैमा परीक्षण शिविरको गाउँघरमा नै सञ्चालन भएकोमा खुसी छ ।” रोग परीक्षणका लागि शिविरमा आएकी कुमारी चौधरीले भन्नुभयो, “आफूले विगतमा पाएको दुःख अरूले नपाऊन् भनेर शिविरमा श्रीमान्लाई परीक्षणका लागि लिएर आएकी छु, परीक्षणपछि श्रीमान् पनि ढुक्क हुनुहुने छ ।” उहाँले आफूले घोराहीमा रहेको राप्ती स्वास्थ्य विज्ञान प्रतिष्ठानबाट नियमित रूपमा रगत चढाउनेलगायतको उपचार गराउँदै आएको बताउनुभयो ।

उहाँ जस्तै सिकलसेल एनिमिया तथा थालेसिमिया रोग पहिचानका लागि राप्ती स्वास्थ्य विज्ञान प्रतिष्ठानको आयोजना तथा घोराही उपमहानगरपालिकाको सहकार्यमा शिविर सञ्चालन गरिएको हो । घोराहीका दुई स्थानमा आयोजना गरिएको सिकलसेल एनिमिया तथा थालेसिमिया रोगको पहिचानका लागि बृहत् परीक्षण तथा परामर्श शिविरमा एक हजार आठ सयभन्दा बढीले रक्त परीक्षण गराएका छन् ।

घोराही उपमहानगरपालिका–१०, नारायणपुरस्थित सिद्धरत्ननाथ माध्यमिक विद्यालय र घोराही–७ स्थित माध्यमिक विद्यालय सौडियारमा आयोजना गरिएको शिविरमा एक हजार ८४० जनाको रक्त परीक्षण गरिएको थियो । जसमा ७०२ जना पुरुष र एक हजार १४६ जना महिला रहेको राप्ती स्वास्थ्य विज्ञान प्रतिष्ठानका निमित्त कार्यालय प्रमुख एवं निर्देशक डा. सुरेश रसाइलीले जानकारी दिनुभएको छ ।

डा. रसाइलीका अनुसार सिद्धरत्नानाथ माविमा ७०९ जना महिला र ३८८ जना पुरुष गरी एक हजार ९७ जना तथा सौडियार माविमा ४३७ जना महिला र ३१४ जना पुरुष गरी ७५७ जनाको परीक्षण गरिएको हो । उहाँले सिकलसेल रोग विशेष गरी थारू समुदायमा बढी देखिने भएकाले उक्त समुदायलाई प्राथमिकतामा राखेर परीक्षण गरिएको बताउनुभयो ।

सिकलसेल एनिमिया रोगबाट बच्नका लागि पूर्वतयारी नै सबैभन्दा ठुलो उपचार भएको भन्दै उहाँले ढुक्कसँग नडराएर परीक्षण गराउन आग्रह गर्नुभएको थियो । एक वर्षको अवधिमा पाँच हजारको परीक्षण गर्ने प्रतिष्ठानको लक्ष्य अनुसार जिल्लाका विभिन्न ठाउँमा शिविरको आयोजना गरेर नागरिकको स्वास्थ्य परीक्षण गर्ने गरेको उहाँको भनाइ छ । परीक्षणको रिपोर्ट तीन सातापछि आउने प्रतिष्ठानले जनाएको छ ।