इरान होर्मुज स्ट्रेट बन्द गर्ने तयारीमा, विश्वमा कस्तो असर पर्ला ?

काठमाडौं । अमेरिकाले इरानमाथि हमला गरेपछि इरानले होर्मुज स्ट्रेट बन्द गर्ने तयारी थालेको छ । इजरायलसँग युद्ध गरिरहेको इरानले अमेरिकाको हमलाको प्रत्युत्तरमा होर्मुज स्ट्रेट बन्द गर्न लागेको हो । यसअघि पनि इरानले होर्मुज स्ट्रेट बन्द गर्ने चेतावनी दिएको थियो । तर, सोमबार इरानको संसद्ले सर्वसम्मतले सो निर्णय गरेसँगै तरंग उत्पन्न भएको छ ।

इरानको संसद्ले सर्वसम्मत निर्णय गरेसँगै अमेरिकी विदेशमन्त्री मार्को रुबियाले होर्मुज स्ट्रेट बन्द गर्नबाट रोक्न चीनसँग आग्रह गरेको छ । होर्मुज स्ट्रेट कच्चा तेल व्यापार गर्ने एक प्रमुख मार्ग हो । सो मार्गबाट विश्वमा चाहिने २० प्रतिशत तेल आउने–जाने गर्छ । यदि, इरानले यो मार्ग बन्द गरिदिएमा अमेरिकालगायत युरोपेली मुलुकमा त्यसको प्रत्यक्ष प्रभाव पर्ने देखिन्छ । आर्थिक उत्तारचढाव बढ्ने भएकाले पनि अमेरिकाले चीन सरकारलाई सो मार्ग बन्द हुनबाट रोक्न आग्रह गरेको हो ।