विश्वकप डेब्युमै शक्तिशाली स्पेनलाई रोक्ने केप भर्डेका ४० वर्षे रोजिन्हा

एटलान्टाको मर्सिडिज–बेन्ज रङ्गशालामा जब रेफ्रीको अन्तिम सिट्ठी बज्यो, तब क्यामराहरू सिधै केप भर्डेका ४० वर्षीय गोलरक्षक रोजिन्हातर्फ तेर्सिए । विश्वकपको सबैभन्दा बलियो दाबेदार एवं युरोपेली च्याम्पियन स्पेनलाई गोलरहित बराबरीमा रोक्दै आफ्नो देशका लागि ऐतिहासिक नतिजा दिलाएपछि उनको आँखाबाट आँसुका धारा बगिरहेका थिए । त्यो आँसुमा केवल खेलको खुसी मात्र थिएन, त्यसमा एउटा सिङ्गो देशको संघर्ष, व्यक्तिगत त्याग र इतिहास लेखिएको खुसी समाहित थियो ।

रंगशालामा उपस्थित ६७ हजार बढी दर्शकको बहुमत हिस्सा स्पेनका समर्थकजस्तो देखिए पनि ६० हजारभन्दा बढीको त्यो भीडमा केप भर्डेका केही हजार समर्थकहरूले सिर्जना गरेको ९० मिनेटको निरन्तर गर्जन र रौनकले एटलान्टालाई जुरुक्कै उचालेको थियो । निलो जर्सी लगाएका र रातो-सेतो तथा निलो झण्डा फहराइरहेका केप भर्डेका समर्थकहरू अंगालो हाल्दै, नाच्दै र गाउँदै यो अभूतपूर्व नतिजाको उत्सव मनाइरहेका थिए । मैदानमा खेलाडीहरू एकअर्कालाई समातेर खुसीले उफ्रिरहेका थिए भने तटस्थ दर्शकहरू समेत केप भर्डेको यो अदम्य साहसको जादुमा परिसकेका थिए ।