ठमेलमा भारतीय पर्यटकको चहलपहल ह्वात्तै बढ्यो, होटेलदेखि क्लबसम्म भरिभराउ

काठमाडौँ । सङ्घीय राजधानीको प्रमुख पर्यटकीय गन्तव्य ठमेलमा पछिल्लो समय भारतीय पर्यटकको सङ्ख्यामा उल्लेख्य वृद्धि भएको छ । पहिले पहिले प्रायः तेस्रो मुलुकका पर्यटकहरूको केन्द्र रहने गरेको ठमेलमा अहिले भने भारतीय पर्यटकको बाहुल्यता देखिन थालेको छ ।

प्रकृति, संस्कृति र साहसिक खेलका लागि उत्कृष्ट गन्तव्यका रूपमा रहेको नेपाल घुम्न आउने भारतीय पर्यटकहरूको केही समययता ठमेल क्षेत्रमा साँझपख विशेष चहलपहल देखिन थालेको यहाँका होटल तथा अन्य पर्यटन व्यवसायीहरू बताउँछन् । विशेष गरी काठमाडौँ आउने अधिकांश भारतीय पर्यटकहरू पशुपतिनाथ क्षेत्रमा बस्ने गरे पनि अचेल स्वयम्भूनाथ, बौद्धनाथ, पाटन र काठमाडौँ दरबार क्षेत्रका सम्पदाहरूको भ्रमणसँगै उनीहरूले ठमेललाई पनि आफ्नो केन्द्र बनाउन थालेका छन् ।