एलनिनो’ को कारण नेपालमा मनसुन भित्रिन अझै केही दिन लाग्ने

काठमाडौं । प्रशान्त महासागरमा विकसित भइरहेको ‘एलनिनो’ को कारण नेपालमा मनसुन भित्रिन अझै केही दिन लाग्ने जल तथा मौसम विज्ञान विभाग मौसम पूर्वानुमान महाशाखाले जनाएको छ । मनसुन आगमनका विषयमा महाशाखाले एक विज्ञप्ती जारी गर्दै ‘एलनिनो’ अझै बलियो हुने क्रममा रहेकोले नेपालको मनसुनआगमनमा समेत प्रभाव पर्ने र दक्षिण एसिया लगायत नेपालको मनसुन कमजोर हुन सक्ने सम्भावना देखिएको जनाएको छ।

नेपालमा मनसुन सरदर जुन १३ मा प्रवेश गर्ने गर्दछ। तर यस वर्ष नेपालमा हालसम्म मनसुनको आगमन भइसकेको छैन। भू-उपमग्रहबाट प्राप्त तथ्यांक तथा गणितीय मौसम पूर्वानुमानको विश्लेषणको आधारमा नेपालमा मनसुन आगमन अझ केहीदिन डिलो हुने सम्भावना रहेको महाशाखाका प्रवक्ता विभूति पोखरेलले जारी गरेको विज्ञप्तीमा उल्लेख छ ।