स्वास्थ्यमन्त्रीविरूद्ध टिप्पणी गरेका अधिकारी भन्छन्, ‘श्रम शोषणको आवाज दबाउन पक्राउ गरियो’

काठमाडौँ । सामाजिक सञ्जालमा स्वास्थ्यमन्त्री निशा मेहताविरुद्ध टिप्पणी गरेको आरोपमा पक्राउ परेका नवेश अधिकारीलाई प्रहरीले रिहा गरेको छ ।

हेल्थ असिस्टेन्ट नवेश अधिकारीलाई धनुषा प्रहरीले नियन्त्रणमा लिएर सोधपुछ गरेपछि रिहा गरेको हो । रिहा भएपछि अधिकारीले रातोपाटीसँग भने, ‘म निरन्तर १० महिनादेखि स्वास्थ्यकर्मीको श्रम शोषणविरुद्ध आवाज उठाइरहेको थिएँ । आन्दोलन पनि गरेको थिएँ कात्तिक महिनामा । त्यतिखेरदेखि नै कन्टिन्यु मैले सोसल मिडियामा आवाज उठाइरहेको थिएँ । त्यही आवाज उठाउँदै क्रममा म कन्टिन्यु टार्गेट श्रम मन्त्रालय र स्वास्थ्य मन्त्रालयको टार्गेट गरेर हामी आवाज उठाइरहेका थियौँ, पोस्ट गरिरहेका थियौँ, भिडियो हालिरहेका थियौँ । त्यसैको क्रममा हामीलाई हिजो राती ८ बजेतिर विना कारण पक्राउ पुर्जी दिएको थियो । प्रहरीले पक्राउ गरेपछि नियन्त्रणमा लिएर सोध्दाखेरि त्यहाँ ’मन्त्रालयबाट निर्देशन छ रे नियन्त्रणमा लिन’ भनेर भने त्यति नै हो ।’