असार ५ देखि ‘९औँ म्याङ्गो राइड २०२६’ आयोजना हुँदै

ललितपुर । ‘द हिमालयन मोटरसाइकल एक्सपिरियन्स’ ले आगामी असार ५ देखि ८ गतेसम्म (जुन १९–२२, २०२६) ‘९औँ म्याङ्गो राइड २०२६’ आयोजना गर्ने भएको छ।

सन् २०१५ देखि निरन्तर रूपमा सञ्चालन हुँदै आएको यो अभियान नेपालमा मोटरसाइकल पर्यटन, कृषि प्रवर्द्धन तथा सामाजिक सेवाको सफल संयोजनका रूपमा स्थापित हुँदै आएको छ।

यस वर्षको राइडमा रोयल इन्फिल्ड नेपाल मुख्य प्रायोजकका रूपमा रहेको छ भने नेपाल पर्यटन बोर्ड ट्राभल पार्टनरका रूपमा सहभागी भएको छ। कार्यक्रम विभिन्न सहयोगी संस्थाको सहकार्यमा सञ्चालन गरिने आयोजकले जनाएको छ।

तराई क्षेत्रमा उत्पादन हुने स्वदेशी तथा अर्गानिक आँपको प्रवर्द्धन गर्नु अभियानको प्रमुख उद्देश्य रहेकाे आयाेजकले जनाएकाे छ। सहभागी राइडरहरूले आँपका बगैँचामा पुगेर प्रत्यक्ष रूपमा आँप टिप्ने र स्वाद लिने अवसर पाउनेछन्। यसले कृषिसँग प्रत्यक्ष अनुभव र सम्बन्ध विस्तार गर्न सहयोग पुग्ने विश्वास गरिएको छ।

त्यस्तै देशका नयाँ तथा सम्भावनायुक्त पर्यटकीय मार्गहरूको खोजी, प्रवर्द्धन र प्रचारप्रसार गर्दै आन्तरिक पर्यटनलाई बढावा दिनु कार्यक्रमको अर्को मुख्य उद्देश्य हो। यसबाट स्थानीय व्यवसाय तथा अर्थतन्त्रमा सकारात्मक प्रभाव पर्ने अपेक्षा गरिएको आयाेजककाे भनाइ छ ।

पर्यटन र कृषिसँगै सामाजिक सेवामा योगदान पुर्‍याउने उद्देश्यले THME ले विभिन्न सामाजिक कार्यक्रमहरू सञ्चालन गर्दै आएको छ। गत वर्ष सम्पन्न ८औँ संस्करणअन्तर्गत सिरहाको लहानस्थित मुसहर बस्तीका करिब २०० विद्यार्थीलाई शैक्षिक सामग्री तथा परिवारलाई झुल वितरण गरिएको थियो। यस वर्ष पनि ट्राफिक सचेतना, सडक सुरक्षा तथा विपद् व्यवस्थापनसम्बन्धी कार्यक्रमलाई निरन्तरता दिइने आयोजकले जनाएको छ।

चार दिने यस वर्षको राइडका लागि काठमाडौं – कुरिनटार – चितवन – सौराहा – ठोरी – वीरगञ्ज – बर्दिबास – लहान – आँप फार्म – बर्दिबास – भीमान – हेटौँडा – कुलेखानी – काठमाडौं रुट ताेकिएकाे छ ।

सन् २०१५ मा केवल चार जना राइडरबाट सुरु भएको ‘म्याङ्गो राइड’ अहिले देशभरिका मोटरसाइकल यात्राप्रेमीहरूको बहुप्रतीक्षित वार्षिक अभियानका रूपमा विकास भएको छ।

THME का संयोजक अर्जुन थापाका अनुसार कृषि, पर्यटन र सामाजिक उत्तरदायित्वलाई एकैसाथ अघि बढाउने यस अभियानले राष्ट्रिय तथा अन्तर्राष्ट्रिय स्तरमा नेपालको सकारात्मक पहिचान स्थापित गर्न महत्त्वपूर्ण योगदान पुर्‍याउने अपेक्षा गरिएको छ।