चीनको कोइला खानीमा ग्यास विस्फोट : मृतक संख्या ९० पुग्यो, ९ अझै बेपत्ता

उत्तरी चीनको शान्सी प्रान्तस्थित एक कोइला खानीमा शुक्रबार राति भीषण ग्यास विस्फोट हुँदा ज्यान गुमाउनेहरुको संख्या ९० पुगेको छ। चाङ्झी शहरको किन्युआन काउन्टीमा रहेको लिउशेन्यु कोइला खानीमा भएको उक्त दुर्घटनामा परि मृत्यु हुनेको संख्या ९० पुगेको चिनियाँ सञ्चार माध्यमहरूले जनाएका छन्।

शान्सी तोङझोउ समूहद्वारा सञ्चालित सो खानीमा स्थानीय समय अनुसार शुक्रबार साँझ ७:२९ बजे भूमिगत ग्यास विस्फोट भएको थियो। दुर्घटनाको समयमा २४७ जना कामदारहरू जमिनमुनि कार्यरत थिए। तीमध्ये अधिकांशलाई बाहिर निकालिए पनि ठूलो संख्यामा मानवीय क्षति भएको छ भने ९ जना कामदार अझै पनि जमिनमुनि फसेका छन्। फसेकाहरूको खोजीका लागि तीव्र रूपमा उद्धार कार्य जारी राखिएको छ।