निर्माण क्षेत्रमा वाणिज्य बैंकहरुको कर्जा सवा २ खर्ब माथि: १३ बैंकले बढाए लगानी,अन्य कसको कति ?

चालू आर्थिक वर्षको वैशाख मसान्तसम्ममा वाणिज्य बैंकहरूले निर्माण क्षेत्रतर्फको कर्जा लगानीमा उल्लेख्य वृद्धि गरेका छन्। नेपाल राष्ट्र बैंकका अनुसार समीक्षा अवधिमा सञ्चालनमा रहेका २० वटा वाणिज्य बैंकहरूले यस क्षेत्रमा कुल २ खर्ब २८ अर्ब ७९ करोड २५ लाख रुपैयाँ बराबरको ऋण प्रवाह गरेका छन् । जुन गत आर्थिक वर्ष २०८१/८२ को सोही अवधिको तुलनामा १०.५१ प्रतिशतको बढी हो। गत वर्षको यसै अवधिमा बैंकहरूले निर्माण क्षेत्रमा २ खर्ब ७ अर्ब ४ करोड २३ लाख रुपैयाँ लगानी गरेका थिए। तथ्यांकअनुसार समीक्षा अवधिमा १३ वटा बैंकले आफ्नो कर्जा बढाएका छन् भने ७ वटाको लगानीमा गिरावट आएको छ।

निर्माण क्षेत्रमा सबैभन्दा बढी रकम लगानी गर्नेमा नबिल बैंक अग्रस्थानमा देखिएको छ। बैंकले वैशाख मसान्तसम्म २६ अर्ब ६७ करोड ९६ लाख रुपैयाँ ऋण लगानी गरेको छ। यो गत वर्षको २५ अर्ब ५६ करोड ३१ लाख रुपैयाँको तुलनामा ४.४७ प्रतिशतले बढी हो। यसैगरी, २५ अर्ब १८ करोड ४४ लाख रुपैयाँ कर्जा प्रवाह गर्दै लक्ष्मी सनराइज बैंक दोस्रो स्थानमा रहेको छ। जुन गत वर्षको २० अर्ब ७५ करोड ७१ लाख रुपैयाँ भन्दा बढी हो। तेस्रो स्थानमा रहेको एनआईसी एसिया बैंकको लगानी भने अघिल्लो वर्षको २२ अर्ब ९७ करोड ९० लाख रुपैयाँबाट ८.७४ प्रतिशतले घटेर २० अर्ब ७४ करोड ८१ लाख रुपैयाँमा सीमित भएको छ।