कोरला नाकाबाट आयात गरिएका बिवाइडीका ईभीलाई ‘क्लिन चिट’, नियन्त्रणबाट सबै सवारी मुक्त

काठमाडौं- मुस्ताङको कोरला नाकाबाट नेपाल भित्रिएका बिवाइडी कम्पनीका विद्युतीय सवारीसाधन (ईभी) माथिको छानबिनका क्रममा प्रारम्भिक रूपमा कुनै कैफियत नदेखिएपछि सशस्त्र प्रहरी बलले नियन्त्रणमा लिएका सबै सवारीसाधन फुकुवा गरेको छ। सशस्त्र प्रहरी बल नेपाल ३३ नं. गुल्म जोमसोमका अनुसार जोमसोम र कोरला नाकामा नियन्त्रणमा राखिएका ईभीहरू आइतबार साँझदेखि सम्बन्धित पक्षलाई जिम्मा लगाएर फुकुवा गरिएको हो।

गत जेठको दोस्रो र तेस्रो सातामा कोरला नाकाबाट बिवाइडीका ७७५ विद्युतीय सवारीसाधन नेपाल भित्रिएका थिए। तीमध्ये ६४९ वटा सवारीको मुस्ताङ भन्सार कार्यालयले जाँचपास गरिसकेको थियो। आयात प्रक्रियामा अनियमितता हुन सक्ने आशंकापछि सशस्त्र प्रहरीले ती सवारीसाधन नियन्त्रणमा लिएको थियो।