जबरजस्ती करणीको अभियोगमा तीन जना पक्राउ

काठमाडौँ । नेपालका विभिन्न तीन जिल्लामा जबरजस्ती करणी गरेको अभियोगमा प्रहरीले तीन जनालाई पक्राउ गरेको छ।

कञ्चनपुर, सिराहा र झापामा जबरजस्ती करणी गरेको छुट्टाछुट्टै उजुरीका आधारमा प्रहरीले अभियुक्तहरूलाई नियन्त्रणमा लिएको हो।

कञ्चनपुरमा १३ वर्षीया एक बालिकालाई जबरजस्ती करणी गरेको अभियोगमा पुनर्वास नगरपालिका वडा नं ५ ग गाउँ बस्ने ५९ वर्षीय सुका डौडे पक्राउ परेका छन्। डौडेले ती बालिकालाई जबरजस्ती करणी गरेको भन्ने उजुरी प्रहरीमा दर्ता भएपछि इलाका प्रहरी कार्यालय त्रिभुवनबस्तीबाट खटिएको प्रहरी टोलीले उनलाई सोमबार दिउँसो पक्राउ गरेको हो।

त्यसैगरी सिराहामा २२ वर्षीया एक महिलालाई जबरजस्ती करणी गरेको अभियोगमा कर्जन्हा नगरपालिका वडा नं ४ बस्ने ३५ वर्षीय दिलिप सदा पक्राउ परेका छन्। सदाले ती महिलालाई जबरजस्ती करणी गरेको उजुरी परेपछि इलाका प्रहरी कार्यालय बन्दीपुरबाट खटिएको प्रहरी टोलीले सक्रियता बढाएर उनलाई गए राति नियन्त्रणमा लिएको हो।

यता झापामा पनि १७ वर्षीया एक किशोरीलाई जबरजस्ती करणी गरेको अभियोगमा एक युवक पक्राउ परेका छन्। पक्राउ पर्नेमा बिर्तामोड नगरपालिका वडा नं ३ बिर्ताबजार बस्ने २९ वर्षीय प्रवृन्ड राउत रहेका छन्। राउतले ती किशोरीलाई जबरजस्ती करणी गरेको उजुरीका आधारमा इलाका प्रहरी कार्यालय अनारमनीबाट खटिएको प्रहरी टोलीले सोमबार राति उनलाई पक्राउ गरेको हो।

जबरजस्ती करणीका यी तीनवटै घटनाका सम्बन्धमा स्थानीय प्रहरी कार्यालयहरूले आवश्यक कानुनी कारबाही अघि बढाउँदै थप अनुसन्धान गरिरहेका छन्।