जेनजी आन्दोलनको एक वर्ष : क्षतिग्रस्त सरकारी संरचना उस्तै

जेनजी आन्दोलन भएको एक वर्ष बित्यो । आन्दोलनको आगोले क्षतविक्षत बनेका सप्तरीका सरकारी कार्यालयका भवन अझै पुनर्निर्माण हुन सकेका छैनन् । कतै भवनमा झ्यालढोका छैनन्, कतै संरचना नै प्रयोग गर्न नसकिने छन् । सामान्य क्षति भएका कार्यालयले जसोतसो आफ्नो काम चलाइरहेका छन् भने पूर्ण रूपमा क्षतिग्रस्त कार्यालय अस्थायी संरचनाको भरमा सेवा दिन बाध्य छन् ।

गत वर्ष भदौ २३ र २४ गते भएको जेनजी आन्दोलनका क्रममा सप्तरीका सरकारी कार्यालयमा तोडफोड र आगजनी हुँदा ७५ करोड ४५ लाख दुई हजार ८३ रुपियाँ बराबरको क्षति भएको जिल्ला प्रशासन कार्यालयको तथ्याङ्क छ । त्यस क्रममा सरकारी कार्यालयका ११३ वटा चारपाङ्ग्रे र १११ वटा मोटरसाइकल नष्ट भएका थिए ।