‘लालीबजार’ रोकिएपछि निश्चल बस्नेतको आक्रोश- ‘अब फिल्म अदालतमा दर्ता गरौँ, त्यहीँ सेन्सर गरौं’

काठमाडौँ । चलचित्र ‘लालीबजार’ को प्रदर्शनमा उच्च अदालत पाटनले अल्पकालीन अन्तरिम आदेश जारी गर्दै रोक लगाएपछि निर्देशक तथा कलाकार निश्चल बस्नेतले आक्रोश पोखेका छन् । सेन्सर बोर्डबाट अनुमति पाइसकेको फिल्म रिलिजको मुखमा रोकिँदा चलचित्रकर्मीको मनोबल गिर्ने भन्दै उनले विद्यमान संयन्त्रमाथि नै प्रश्न उठाएका हुन् ।

मंगलबार फेसबुकमा आफ्नो धारणा राख्दै बस्नेतले अदालतको आदेशलाई सम्मान गर्ने बताउँदै फिल्म निर्माणको मर्म र प्रक्रियालाई बुझ्न जरुरी रहेको उल्लेख गरे । उनले लेखेका छन्, “सम्माननीय अदालतको आदेश नमान्ने कुरै भएन । आदेश सबैले मान्नुपर्छ । तर कुरा जब फिल्मको र फिल्मकर्मीहरूको आउँछ, तब फिल्म केका लागि बनाइन्छ कसरी बनाइन्छ भन्ने कुरा पनि बुझ्नुपर्छ होला । एकतर्फी रूपमा मात्रै हेरेर यसरी नै रिलिजको मुखैमा मुद्‍दा पर्दै अदालतले निर्णय गर्दै जाने हो भने चलचित्रकर्मीको मनोबल त गिर्छ नै, एकचोटि हैन बारम्बार ।"