प्रदेश खारेज गरौं, त्यो पैसाले शिक्षा र स्वास्थ्य निःशुल्क गर्न सकिन्छ : चित्रबहादुर केसी

राष्ट्रिय जनमोर्चाका अध्यक्ष चित्रबहादुर केसीले सात प्रदेशका सांसद पाल्ने खर्चले देशको स्वास्थ्य र शिक्षा निःशुल्क हुने दाबी गरेका छन् ।

पार्टीले शनिबार बुटवलमा आयोजना गरेको अन्तरक्रिया कार्यक्रममा नेता केसीले संघीयता खारेजीको विकल्प नभएको दोहोर्‍याउँदै मुलुकका सातै प्रदेश खारेज गर्न सके राज्यले शिक्षा र स्वास्थ्यको जिम्मा लिन सक्ने बताए । 'सात वटा प्रदेशको खर्च खारेज गरेर शिक्षा र स्वास्थ्य नेपाली जनतालाई 'फ्री' गर्न सक्छ । शिक्षा र स्वास्थ्यमा ४ अर्ब रुपैयाँ भए हुन्छ,' अध्यक्ष केसीले भने ।

आफूले शुरूदेखि नै देशले संघीयता धान्न नसक्ने भन्दै आइरहेको र प्रदेश संरचना देशका लागि आवश्यक नै नभएको उनको भनाइ थियो ।

पछिल्लो परिवर्तनमा आफूले दलका नेताहरूलाई सुझाउँदै आए पनि त्यसको सुनुवाइ नगर्दा अहिलेको अवस्था आएको उनले बताए । 'राजनीति विशुद्ध कमाउनकै लागि मात्र भएपछि जनताले कति सहन्छ ? त्यसको असर के पर्‍यो अहिले देशको अस्तित्वमाथि नै प्रश्न चिह्न लाग्ने अवस्था आयो,' केसीले थपे ।