बहुआयामिक बजेट सामाजिक न्यायको मार्गचित्र

विगत केही वर्षयता नेपाली अर्थतन्त्रले अनेक आन्तरिक र बाह्य चुनौतीहरूको सामना गर्दै आएको छ । कोभिड–१९ को दीर्घकालीन असर, विश्वव्यापी भू–राजनीतिक तनावका कारण सिर्जना भएको आपूर्ति शृङ्खलाको अवरोध र आन्तरिक बजारमा देखिएको शिथिलताका कारण हाम्रो आर्थिक वृद्धिदर अपेक्षित रूपमा सुस्त रहेको थियो ।

यस्तो पृष्ठभूमिमा आउने प्रत्येक आर्थिक वर्षको बजेट केवल अंकहरूको सँगालो मात्र नभई समग्र मुलुकको आर्थिक पुनरुत्थानको दियो बन्नुपर्ने दबाबमा हुन्छ । यसै परिप्रेक्ष्यमा सरकारद्वारा प्रस्तुत आगामी आर्थिक वर्ष २०८३÷०८४ को बजेटले विगतका नीतिगत अन्योल र आर्थिक संकुचनलाई चिर्दै एक नयाँ र सकारात्मक दिशानिर्देश गरेको छ । निराशाको कुहिरोभित्र रुमल्लिरहेको वर्तमान बजारलाई यस बजेटले ढाडस मात्र दिएको छैन, बल्कि दिगो र समावेशी विकासको प्रष्ट मार्गचित्रसमेत कोरेको छ ।