रित्तिदै पहाड बस्ती उजाड

बैतडीमा मध्य पहाडी लोकमार्ग भए पनि काठमाडौँ चल्ने बसले यात्रु नपाउँदा बससेवा ठप्प छ । कुल १८ करोड रुपियाँ खर्च गरेर निर्माण भएको बैतडी विमानस्थलको हवाईउडान पनि बन्द छ । पहाडमा गुड्ने र उड्ने साधनले यात्रु पाउन सकेका छैनन् । बैतडीका १० स्थानीय तहका ८४ वडामा सडक सञ्जाल पुगे पनि रिजर्भ बाहेक गाडी चल्दैनन् । अवसरको खोजीमा मानिसले पहाड छोड्न थालेपछि गाउँ बस्ती उजाड बनेको छ ।

यहाँको भीमदत्त प्राविधिक शिक्षालयले भने जति विद्यार्थी पाउन सकेको छैन । बीएससी एजीको पढाइ हुने गोकुलेश्वर कृषि क्याम्पसमा वार्षिक ५० जना विद्यार्थी भर्ना हुन पाउने कोटा भए पनि १० जना मात्रै विद्यार्थी भर्ना हुने गरेका छन् । सदरमुकामस्थित जगन्नाथ बहुमुखी क्याम्पसमा गणित विषयको पढाइ हुने भए पनि अध्ययन गर्ने एकजना पनि विद्यार्थी छैनन् । मध्य पहाडी लोकमार्ग र महाकाली कोरिडोर जस्ता गौरवका आयोजना लागू भए पनि यी योजनाले पहाडमा मानिस रोक्न सकेको छैन ।