तमोर नदीको निर्माणाधीन मोटरेवल पुल बाढीले बगायो

तमोर कोरिडोर सडकअन्तर्गत ताप्लेजुङ र पाँचथर जोड्ने तमोर नदीमा निर्माण गरिँदै आएको मोटरेवल (मोटर गुड्ने) पुल बाढीले बगाएको छ । शुक्रबार राति भीषण वर्षासँगै तमोर नदीमा आएको बाढीले निर्माणाधीन उक्त मोटरेवल पुल बगाएको हो ।

भारतसँगको सिमान जोगवनीदेखि मोरङको विराटनगर रानी हुँदै चीनको स्वशासित क्षेत्र तिब्बतसँगको सिमाना टिपताला जोड्ने त्रिदेशीय सडक मार्गको रुपमा रहेको तमोर कोरिडोरअन्तर्गत तमोर नदीमा आठ वर्षअघि मोटरेवल पुल निर्माण गर्न सुरु गरिएको थियो । ताप्लेजुङको आठराई त्रिबेणी गाउँपालिका–१ निघुरादिन र पाँचथरको हिलिहाङ गाउँपालिकाको आङ्बुङ जोड्ने गरी पुल निर्माण हुँदै आएको थियो ।