जेनजी आन्दोलनका घाइते अनिशकी आमाको प्रश्न- काठमाडौँका मात्रै जेनजी ? पोखराका होइनन् ?

पोखरा । 'बुबाले सानैमा छोडेर जानुभयो । छोराहरूको हेरचाह मैले गरेँ । उमेर पुग्यो, नागरिकता नभएका कारण पहिलो पटक सरकारले दिने भनेको राहत-भत्ता पनि हामीले पाउन सकेनौँ,' अम्बिका सापकोटा मंगलबार पोखरा सभागृहमा उभिएर आफ्ना पीडा सुनाउँदै थिइन् ।

उनका छोरा अनिशको गत वर्ष जेनजी आन्दोलनका क्रममा गोली लागेर देब्रेपट्टिको गाला र बङ्गाराको हड्डी भाँचिएको थियो । बाबुको ठेगान नभएकै कारण अनिशले नागरिकता पाएका छैनन् । सरकारले पहिलो चरणमा दिने भनेको राहतसमेत उनले नागरिकता नभएकै कारण पाएनन् ।