अभिनव बज्रका भाइरल भिडियो पछाडिका ‘जादुगरी’ लेखक

सामाजिक सञ्जालमा कुनै पनि सामग्री भाइरल हुनुमा त्यसको विषयवस्तु (कन्टेन्ट) को सबैभन्दा ठूलो हात हुन्छ । विषयवस्तु जति छोटो, राम्रो र प्रभावकारी भयो, भिडियो त्यति नै धेरै दर्शकसम्म पुग्छ । यसको पछिल्लो उदाहरण हुन्, ‘मीठो मीठो मीठो’ भन्दै आफ्नो फुड ब्लग यात्रा सुरु गरेका अभिनव बज्र । अचेल उनी टिकटक र फेसबुकमा दीनदुःखीलाई सहयोग गरेको भिडियोमार्फत लाखौं दर्शकको मन जितिरहेका छन् ।

उनको प्रभावकारी विषयवस्तु, प्रस्तुति शैली, र भिडियोमा प्रयोग हुने क्याप्सन र कमेन्टका कारण उनका भिडियोले दश लाख भ्युज पाउनु सामान्य जस्तै भइसकेको छ । उनका भिडियो हेरेर नछुने र नरुने दर्शक सायदै कम होलान् । उनको शिष्ट बोली, दीनदुःखीलाई गर्ने सहयोग र सबैप्रतिको समान व्यवहार प्रशंसनीय छ । अभिनवकै भिडियोमार्फत असक्त हातले बाल्टिन झुण्ड्याउँदै कुकुरलाई खाना खुवाउँदै हिँड्ने रश्मी दिदी देश–विदेशमा भाइरल भइन् । रश्मी दिदीको भिडियो भाइरल भएसँगै त्यसको कन्टेन्ट, क्याप्सन र कमेन्टको पनि निकै चर्चा भयो ।