भारतीय पर्यटक लक्षित पर्यटन बोर्डको ‘गाइडलाइन’

पछिल्लो समय पोखरामा भारतीय पाहुनाको अधिक भीडभाड छ। भारतीय पाहुनाको यो भीड पोखरामा मात्र नभई हिमाली जिल्ला मुस्ताङसम्म पनि उत्तिकै छ। मुस्ताङमा मुक्तिनाथ मन्दिर दर्शन गर्न जाने भारतीयका कारण भीडभाड छ। पोखरा र आसपासका सबैतिरका पर्यटकीय क्षेत्रमा अहिले भारतीय पाहुनाको अधिक भीड लाग्दा यहाँका पर्यटन व्यवासायी खुसी छन्।

पाहुना बढ्दा यहाँका होटलको अकुपेन्सी अकाशिएको छ। व्यावसायीका अनुसार अघिल्ला वर्ष यो बेला पोखराका होटलको अकुपेन्सी २० प्रतिशत हाराहारीमा हुन्थ्यो। तर, यो पटक भने पोखराले यतिबेला ९० प्रतिशतसम्म अकुपेन्सी उकास्न सफल भयो। भारतीय पाहुनाको आगमनको यो प्रभावले पोखराको पर्यटन क्षेत्र सुस्ताउने यो समयमा निकै नै उकासिएको उनीहरुको भनाई छ।