सेनेगलको सानदार जित: इराकमाथि ५–० को गोल वर्षा, अघिल्लो चरणको सम्भावना जीवित

काठमाडौँ । फिफा विश्वकप २०२६ अन्तर्गत समूह ‘आई’ को आफ्नो अन्तिम खेलमा सेनेगलले इराकमाथि ५–० को फराकिलो जित दर्ता गरेको छ । शनिबार सम्पन्न एकपक्षीय खेलमा जित निकाल्दै सेनेगलले समूह चरणको सुखद अन्त्य गरेको छ ।

खेलको चौथो मिनेटमै हबिब डियाराको गोलबाट सेनेगलले सुरुवाती अग्रता लिएको थियो । खेलको १३औँ मिनेटमा इराकका डिफेन्डर रेबिन सुलाकाले रातो कार्ड खाँदै मैदान बाहिरिएपछि इराक १० खेलाडीमा सीमित भएको थियो । यसको फाइदा उठाउँदै सेनेगलले दोस्रो हाफमा गोलको वर्षा गर्‍यो । सेनेगलका लागि ५६औँ मिनेटमा इस्माइला सार, ५९औँ र ७१औँ मिनेटमा पापे गुए तथा ८२ औँ मिनेटमा इलमान न्डियाइले गोल गर्दै टोलीलाई ५–० को सानदार जित दिलाए ।