नदीजन्य पदार्थ ठेक्कामा भ्रष्टाचार : बडीकेदार गाउँपालिकाको अध्यक्ष, उपाध्यक्ष प्रशासन प्रमुख र ठेकेदार लगायत ८ जना विरुद्ध मुद्दा

काठमाडौं/ डोटीको बडीकेदार गाउँपालिकामा नदीजन्य पदार्थ उत्खनन तथा राजस्व संकलनसम्बन्धी ठेक्कामा अनियमितता भएको छ ।

सार्वजनिक सम्पत्तिमा हानी–नोक्सानी पुर्‍याएको आरोपमा पूर्व जनप्रतिनिधि, कर्मचारी तथा निर्माण व्यवसायीसहित ८ जनालाई अख्तियार दुरुपयोग अनुसन्धान आयोगले भ्रष्टाचार मुद्दा हालेको प्रवक्ता सुरेश न्यौपानेले जानकारी दिए ।

आयोगका अनुसार आर्थिक वर्ष २०७७/ ७८ मा ठूलीगाड र कापडीगाड नदीबाट ढुंगा, गिट्टी तथा बालुवा उत्खननसम्बन्धी ठेक्कामा मिलेमतो गरी गाउँपालिकाले प्राप्त गर्न सक्ने राजस्व रकम अस्वाभाविक रूपमा घटाइएको थियो। प्रारम्भिक वातावरणीय परीक्षण ९क्ष्भ्भ्० प्रतिवेदन अनुसार वार्षिक ३३ लाख ११ हजार ३४६ रुपैयाँ ८० पैसा राजस्व संकलन गर्न सकिने अवस्था हुँदाहुँदै न्यूनतम ठेक्का रकम क्रमशः घटाएर २ लाख रुपैयाँसम्म कायम गरिएको आयोगको प्रमाणले देखाएको छ ।

अनुसन्धानबाट ठेक्काको सूचना कानुन बमोजिम राष्ट्रिय तथा प्रदेशस्तरीय पत्रिकामा प्रकाशन नगरिएको, प्रतिस्पर्धा सीमित पार्ने उद्देश्यले सूचना अवधि घटाइएको तथा पूर्वयोजना अनुसार भागरथी निर्माण सेवा, धनगढीसँग सम्झौता गरिएको खुलेको आयोगले पुष्टि गरेको छ ।

आयोगका अनुसार ठेक्का सम्झौता बमोजिम गाउँपालिकाले प्राप्त गर्नुपर्ने १४ लाख १० हजार २४० रुपैयाँ राजस्व हालसम्म राज्यकोषमा दाखिला नगरिएको पाइएको छ। उक्त रकम बराबरको बिगो कायम गरी भ्रष्टाचार निवारण ऐन, २०५९ अन्तर्गत कारबाहीको माग गरिएको हो ।

मुद्दा दायर गरिएका मध्ये बडीकेदार गाउँपालिकाका तत्कालीन अध्यक्ष कृष्णबहादुर चन्द, उपाध्यक्ष इन्द्रा कुमारी बोहरा, निमित्त प्रमुख प्रशासकीय अधिकृत दीपकराज जैशी र लेखापाल युवराज भट्टमाथि १४ लाख १० हजार २४० रुपैयाँ बिगो कायम गरिएको छ।

त्यस्तै, तत्कालीन शिक्षा अधिकृत विवेक देउवा र सब–इन्जिनियर दानबहादुर पछेरामाथि गलत प्रतिवेदन तथा सिफारिस दिएको आरोपमा भ्रष्टाचार निवारण ऐनको दफा १९ (२) अन्तर्गत मुद्दा दायर गरिएको छ।

यस्तै भागरथी निर्माण सेवा, धनगढी तथा त्यसका सञ्चालक पशुपति जोशी र अख्तियार प्राप्त व्यक्ति केशवबहादुर बमलाई गैरकानुनी लाभ लिएको आरोपमा मुख्य कसूरदारसरह सजायको माग गर्दै विशेष अदालत, काठमाडौंमा आरोपपत्र दायर गरिएको प्रवक्ता न्यौपानेले बताए ।

सम्बन्धित विषय:

# बडीकेदार गाउँपालिका