गर्मीका कारण विरामी परे विद्यार्थी

एक साता यता बढेको गर्मीका कारण विद्यार्थी बिरामी परेका छन् । तुलसीपुर उपमहानगरपालिका वडा १८ मा रहेको जनता संस्कृत माध्यमिक विद्यालयका विद्यार्थी बिरामी परेका छन् ।

जनता संस्कृत माध्यमिक विद्यालयका शिक्षक शङ्कर आचार्यका अनुसार बिहीवारदेखि विद्यार्थी बिरामी परेका हुन् । बिहीबार सात जना बिरामी परेका थिए भने शुक्रबार पाँच जना विद्यार्थी बिरामी परेका थिए ।

शिक्षक आचार्यका अनुसार बिरामी परेका विद्यार्थी बेहोस् हुने, टाउको दुख्ने र वान्ता हुने समस्या देखिएको बताउनुभयो । बिरामी भएका विद्यार्थीलाई विद्यालयको प्राथमिक उपचार कक्षमा राखेर उपचार पश्चात् घर पठाइएको बताउनुभयो ।

यता, तुलसीपुर उपमहानगरपालिका शिक्षा शाखा प्रमुख चक्रबहादुर भण्डारीले पालिकाभित्र रहेका विद्यालयमा विद्यार्थी बिरामी परेको विषयमा कुनै जानकारी नआएको बताउनुभयो । उहाँले शनिबार र आइतबार दुई दिन बिदा भएकाले विद्यालय तत्काल बिदा नदिइने बताउनुभयो ।

तुलसीपुर उपमहानगरपालिकाले सञ्चालनमा ल्याएको तुलसीपुर मेट्रो कलेज–बहुप्राविधिक शिक्षालयले चैत २५ देखि २९ गतेसम्म बिदा दिएको छ । कलेजका प्राचार्य वसन्त आचार्यका अनुसार अत्यधिक गर्मीका कारण कलेज बिदा दिइएको जानकारी दिनुभयो ।

जल तथा मौसम विभागले दाङसहित १४ जिल्लामा अत्यधिक गर्मी बढ्ने भन्दै सर्तकता अपनाउन आग्रह गरेको छ ।