तराईमा उत्पादित दूधबाट इलाममा छुर्पी !

विराटनगर । तराईमा उत्पादित दूधबाट छुर्पी बन्छ कि बन्दैन ? बने पनि गुणस्तरीय बन्छ ? गत वर्षदेखि तराईको दूधबाट छुर्पी उत्पादन गर्न थालिएको छ । हाल तराईमा अत्यधिक दूध उत्पादन भइरहेको छ । दूध बढी हुँदा दूधबाट उत्पादित पाउडर तथा घिउ बजारमा लाखौँ किलो स्टकमा छ । तर छुर्पी भने विदेश निर्यात भइरहेको छ । छुर्पीको निर्यात बढ्दै जानु र तराईको दूधबाट छुर्पी उत्पादन सुरु हुनुलाई सुखद संयोग मानिएको छ ।

मोरङ कानेपोखरीमा रहेको नवदुर्गा डेरी उद्योगका सञ्चालक राजकुमार खनालले गत वर्ष र अहिले गरेर झन्डै ६० हजार लिटर दूध इलामका दुई उद्योगमा पठाए । उक्त उद्योगले उत्पादन गरेको छुर्पीको गुणस्तरमा खासै समस्या आएन । ‘एक पटक छुर्पीमा केही कालो दाग बसेको जस्तो देखियो भन्न आयो । तर गुणस्तरमा समस्या देखिएन,’ खनालले भने, ‘गत वर्ष राम्रो भएको प्रतिक्रिया आएको थियो ।’