जेनजी आन्दोलनको एक वर्ष : नयाँ नेतृत्व, जनताले कति महसुस गरे नयाँपन ? (भिडियो)

काठमाडौँ । २३ भदौ २०८३ । यो मितिबाट ठ्याक्कै एक वर्षअघि फर्केर हेरौँ । त्यस दिन जेनजी पुस्ताका युवाहरूले स्वत:स्फूर्त रूपमा अभूतपूर्व आन्दोलन गरेका थिए । भ्रष्टाचार अन्त्य, सुशासन कायम र सोसल मिडिया प्रतिबन्ध फुकुवाको माग गर्दै उनीहरूले गरेको सडक प्रदर्शनले तत्कालीन एमाले-कांग्रेसको झन्डै दुईतिहाइको सरकारलाई घुँडा टेकाएको थियो । त्यसबेला प्रधानमन्त्री थिए केपी शर्मा ओली ।

विडम्बना, जेनजी आन्दोलनले परिवर्तनको सुखद् खबर ल्याउन भूमिका खेलेपनि कहालीलाग्दा क्षणहरू पनि उत्तिकै थिए । २३ भदौको दिन प्रदर्शनका क्रममा प्रहरीले गोली चलाउँदा काठमाडौँमा १७ र इटहरीमा २ गरी १९ जना युवाले ज्यान गुमाए । भोलिपल्ट अर्थात् २४ भदौमा जेनजीका नाममा प्रदर्शन अराजक बन्दा संसद् भवन, सिंहदरबार, सर्वोच्च अदालत, सरकारी कार्यालय, प्रहरी कार्यालय, राजनीतिक दलका कार्यालय, नेताहरूका घर, व्यापारिक प्रतिष्ठानहरूमा अकल्पनीय आगजनी र तोडफोड भए ।