चितवनबाट अपहरण परेका किशोरको काठमाडौंमा उद्धार, पाँच जना पक्राउ

चितवनको नारायणगढबाट अपहरणमा परेका १६ वर्षीय एक किशोरलाई काठमाडौंबाट सकुशल उद्धार गरिएको छ । घटनामा संलग्न पाँच जना भारतीय नागरिकलाई प्रहरीले नियन्त्रणमा लिएको छ ।

काठमाडौं उपत्यका अपराध अनुसन्धान कार्यालयका प्रमुख एसएसपी सन्तोष खड्काका अनुसार असार १ गते सोमबार साँझ करिब ६:३० बजे चितवनको नारायणगढबाट ५–६ जनाको समूहले स्थानीय १६ वर्षीय रिसब गुप्तालाई जबरजस्ती भारतीय नम्बर प्लेटको गाडीमा राखेर काठमाडौं ल्याएको भन्दै प्रहरीमा उजुरी परेको थियो ।

त्यसपछि अपहरणकारीहरूले उनलाई काठमाडौंको एक होटलमा बन्धक बनाएर परिवारसँग फिरौती रकम माग गरेको सूचनाका आधारमा प्रहरी टोली परिचालन गरिएको थियो ।

खोजतलासका क्रममा बसपार्कस्थित होटल फेमिलीबाट गुप्तालाई सकुशल उद्धार गरिएको र घटनामा संलग्न पाँच जनालाई नियन्त्रणमा लिइएको एसएसपी खड्काले बताए ।

पक्राउ पर्नेहरू भारतको बिहार राज्यको बेतिया निवासी १८ वर्षीय सुजित कुमार, १८ वर्षीय गोलु कुमार, अर्का १८ वर्षीय गोलु कुमार, १८ वर्षीय बिक्कि कुमार र १८ वर्षीय मोहम्मद साहिद रहेका छन्।

घटनाबारे थप अनुसन्धान भइरहेको प्रहरीले जनाएको छ।