उनीसँगै केही उच्च पदस्थ अधिकारीहरू निगरानीमा राखिएको अख्तियार स्रोतले जनाए

काठमाडौं। ई–पासपोर्ट खरिद टेण्डरमा अनियमितता भएको आरोपमा राहदानी विभागका महानिर्देशक तिर्थराज अर्याललाई अख्तियार दुरुपयोग अनुसन्धान आयोगले पक्राउ गरेको छ।

उनीसँगै केही उच्च पदस्थ अधिकारीहरू निगरानीमा राखिएको अख्तियार स्रोतले जनाएको छ।

अर्याल पक्राउ हुनुअघि सोमबार मात्रै प्रधानमन्त्री बालेन शाहले अख्तियारका पदाधिकारीहरूसँग प्रधानमन्त्री तथा मन्त्रिपरिषद् कार्यालयमा भेट गरेका थिए।

ई–पासपोर्ट टेण्डर विवाद

मंसीर २०८१ मा राहदानी विभागले पाँच वर्षका लागि ६४ हजार थान ई–पासपोर्ट खरिद गर्न डेढ महिनाको समयसीमा तोकेर टेण्डर निकालेको थियो। शर्तहरू केही निश्चित कम्पनीलाई अनुकूल हुने गरी राखिएको भन्दै विवाद उत्पन्न भएको थियो। नेपालमा पहिलेदेखि नै राहदानी आपूर्ति गर्दै आएको आइडिमियालाई लाभ हुने गरी शर्त बनाइएको आरोप लगाइएको थियो।

प्रतिस्पर्धा सीमित गरिएको भन्दै विभिन्न कम्पनी र सरोकारवालाले अख्तियार, सार्वजनिक खरिद अनुगमन कार्यालय, प्रधानमन्त्री तथा मन्त्रिपरिषद् कार्यालय तथा राज्य व्यवस्था समितिमा उजुरी दिएका थिए। उजुरीमाथि अनुसन्धान अघि बढ्न नसक्दा विभागले दुई हिस्सामा ६ अर्ब ११ करोड र १ अर्ब ५५ करोड रुपैयाँमा पासपोर्ट ठेक्का दिएको थियो।

उच्चस्तरीय संलग्नता

अख्तियार स्रोतका अनुसार टेण्डर अघि बढ्ने क्रममा तत्कालीन परराष्ट्रमन्त्री आरजु देउवा, उनका छोरा जयवीर देउवा, व्यवसायी मनिन्द्रराज मल्ल, त्यतिबेला राष्ट्रपतिका राजनीतिक सल्लाहकार रहेका सुनिल थापा लगायतका व्यक्तिहरूको हस्तक्षेप भएको भनी उजुरी परेका थिए।

हाल राष्ट्रिय सभा सदस्य रहेका सुनिल थापाको प्रत्यक्ष कागजी संलग्नता देखिएको छैन तर उनका छोरा सिद्धार्थ थापाको भूमिकाबारे प्रश्न उठिरहेको अख्तियार स्रोतले जनाएको छ। परराष्ट्र मन्त्रालयका केही उच्च पदस्थ अधिकारीहरूमाथि पनि निगरानी बढाइएको छ।