समस्याग्रस्त सहकारी व्यवस्थापन समितिले द्रुत गतिमा काम गर्न सकेन: मन्त्री इङ्नाम

काठमाडौँ। भूमि व्यवस्था, सहकारी तथा गरिबी निवारणमन्त्री कुमार इङ्नामले समस्याग्रस्त सहकारी व्यवस्थापन समितिले द्रुत गतिमा काम गर्न नसकेको बताएका छन् । सिंहदरबारस्थित मन्त्रालयमा शनिबार सहकारी पीडितहरूसँग भएको छलफलमा उनले समितिले पीडितको भावनाअनुसार काम गर्न नसकेको बताएका हुन् ।

मन्त्री इङ्नामले भने, “यो समितिले पीडितको भावनाअनुसार एउटा गतिका साथ काम गर्न सकेको छैन । २३ वटा सहकारीमा रु ४५ अर्बभन्दा बढी व्यवस्थापन गर्नुपर्नेछ, यति ठुलो रकमको व्यवस्थापन गर्नका लागि सात जनाको समितिले तत्काल काम गर्न सक्दैन । धेरै अधिकार तर अनुभवको कमी भएका कारण पनि समितिले द्रुत गतिमा काम गर्न नसकेको मैले महसुस गरेको छु ।”