अर्जेन्टिनासँगको हारपछि इजिप्ट प्रशिक्षकको प्रतिक्रिया : ‘मेस्सीलाई जिताउन धाँधली भयो, अरू खेल हेर्दिन’

गएराति विश्वकप २०२६ को अर्जेन्टिना र इजिप्टबीचको खेलमा साविक विजेता अर्जेन्टिनाले जित हासिल गर्‍यो। मंगलबार एटलान्टामा भएको खेलमा इजिप्टले सुरुआतमा २–० को अग्रता बनाए पनि साविक विजेता अर्जेन्टिनाले उत्कृष्ट पुनरागमन गर्दै खेल ३–२ ले नतिजा आफ्नो पक्षमा पारेको थियो। तर खेल विवाद मुक्त भएन। अर्जेन्टिनाले लगाएको तेस्रो गोललाई लिएर इजिप्टका खेलाडी र म्यानेजर टिम असन्तुष्ट भने। तर उनीहरूको कुरा सुनुवाइ भएन र गोल दिइयो। योसँगै इजिप्टका मुख्य प्रशिक्षक होसाम हसनले विश्वकप फुटबलको क्वाटरफाइनल पुग्ने ऐतिहासिक अवसरबाट आफ्नो टोलीलाई धाँधली गरेर वञ्चित गरिएको आरोप लगाएका छन्।

खेलपछि आयोजित पत्रकार सम्मेलनमा आक्रामक रूपमा प्रस्तुत भएका हसनले भने, “म यसलाई सामान्य भाग्यको खेल भनेर मिठो भाषामा टार्न चाहन्न । आज हामीमाथि सरासर धोकाधडी भएको छ । हामी ठूलो अन्यायको सिकार भएका छौँ ।” इजिप्ट १–० ले अघि बढिरहेको अवस्थामा मोस्ताफा जिकोले अर्को गोल गरेका थिए । तर, भिडियो असिस्टेन्ट रेफ्रीले त्यसअघि लिसान्ड्रो मार्टिनेजमाथि फल भएको देखाउँदै उक्त गोल खारेज गरिदियो । त्यसपछि पनि जिकोले अर्को गोल गर्दै इजिप्टलाई पहिलोपटक विश्वकपको अन्तिम आठनजिक पुर्‍याएका थिए ।