मेयर बालेनको आलोचना र समर्थन

प्रारम्भ

राजधानी सहरका प्रमुख बालेनजीको क्रियाशीलता र राष्ट्रियताका पक्षमा मुखरित भएका अभिव्यक्ति एवं कार्यले नेपालको राजनीति तरंगित बनेको छ । युवा ¥यापर बालेनलाई विशेषगरी युवाको समर्थन रहेको छ । स्वतन्त्र हैसियतमा निर्वाचन जितेका प्रमुख बालेनजीको कार्यशैली यसअघिका प्रमुखको भन्दा पृथक छ । राष्ट्रियताका पक्षमा विशेषगरी उनले केही निर्णयहरू लिए । पहिलो हो, हालैका दिनमा काठमाडौंका सिनेमा हलमा आदिपुरूष प्रदर्शन भइरहेको थियो । हिन्दी चलचित्र आदिपुरुषमा नेपालकी राष्ट्रिय विभूति तथा नेपाली चेली सीतालाई भारतीय चेलीका रूपमा चित्रित गरिएकोमा मेयरको आपत्ति थियो । उनले सो दृश्य नेपालमा मात्र होइन, भारतमा समेत हटाएर मात्र प्रदर्शन गर्न सुझाव दिए । संशोधन नभएसम्म काठमाडौंका हलमा कुनै पनि हिन्दी सिनेमा प्रदर्शन गर्न नदिने अडानसहितको निर्णय लिए । पाटन उच्च अदालतले हिन्दी फिल्म रोक नलगाउन आदेश दियो ।