बजेट सन्तुलित भएपनि अटोमोबाइल क्षेत्रमा थप भार : नाडा

काठमाडौं । नाडा अटोमोबाइल्स एसोसिएसन अफ नेपालले आर्थिक वर्ष २०८३/८४ को बजेट समग्रमा सन्तुलित र भविष्य निर्माणमुखी रहेको टिप्पणी गरेको छ । यद्यपि सवारी साधनमा थप करको व्यवस्था गरिएकाले अटोमोबाइल क्षेत्र प्रभावित हुने संकेत गरेको छ ।

एसोसिएसनले अर्थमन्त्री डा. स्वर्णिम वाग्लेले संघीय संसदमा प्रस्तुत गरेको बजेटप्रति आफ्नो ध्यानाकर्षण भएको जनाउँदै विद्युतीय सवारी साधनमा लाग्दै आएको अन्त:शुल्क हटाएर स्वच्छ पूर्वाधार लगानी शुल्क लागू गर्ने निर्णयले बजारमा असर पार्ने जनाएको छ । नाडाका अनुसार नयाँ व्यवस्थाका कारण विद्युतीय मात्र नभई इन्धनबाट चल्ने सवारी साधनको मूल्यसमेत बढ्ने देखिएको छ ।