धनको मोह र हाम्रो बजार

तीज गयो । आमा, दिदीबहिनीले उत्ताउलो ढंगले नाचे । बजार उत्ताउलो भएको त धेरै भइसक्यो । धनको आकर्षणले कसैलाई नछोड्दो रहेछ, महादेवका पनि तीन नेत्र रे । धनको मोहले गर्दा नै सत्तासीन मात्रै होइन धेरै कालो कोठरीतिर पनि छन् अहिले, धनकै लोभले मान्छेले मान्छ मार्न पनि अग्रसर भएकै देखियो । पूर्वीय धर्म दर्शन निकै फराकिलो र लचकदार छ, तर उर्लिँदो भेलले बढार्ला जस्तो भइसकेको छ । पहिले बजेट असारमा मात्रै आउँथ्यो र त्यति बेलादेखि बजार उर्लन्थ्यो, अहिले गणतन्त्रमा बजेट जेठैमा आउँछ, त्यति बेला नै उर्लेको बजार शान्त हुन जान्दैन, यसपालि त दसैं तिहार पनि शरद नाघिसकेपछि परेकाले बजारको उर्लिँदो महँगीको बाढी वर्षैभरि रोकिने देखिएन ।

राष्ट्र बैंकले मूल्य नियन्त्रण हुन्छ भनिरहँदा सरकारी संकेत ठिक उल्टो हुने गरेको छ । चिनी खानलाई सहज भएन, सरकारले २० हजार मे टन चिनीमा भन्सार शुल्क आधा मिनाहा गर्ने खबर भरखरै आएको छ, तर बजारको भाउ घट्ला जस्तो छैन । सबै सामानमा ढुवानी खर्च बढेको भनिन्छ,, व्यापारी भान्छामा भ्याट लाग्यो भन्छन् । साँच्चै संघीयता र गणतन्त्र निकै महँगो भए जस्तै बजार महँगो भएको छ र गएको आर्थिक वर्षको भन्दा ४० प्रतिशत राजस्व थप उठाउने भन्दै छ सरकार, यसै वर्षको बजेट भाषणमै भनेको र अझ कताबाट थप्न सकिन्छ भन्दै विद्याधर मल्लिकको संयोजकत्वमा राजस्व समिति बनाइसकेको छ ।