कोशी प्रदेश मन्त्रिपरिषद्का निर्णय : लोकसेवाको सचिवमा तामाङ, महालेखाको प्रतिवेदन सभामा पेस गरिने

विराटनगर । कोशी प्रदेश सरकार मन्त्रिपरिषद्को छैटौँ बैठकले कर्मचारीको पदस्थापनदेखि विभिन्न प्रतिवेदन तथा मापदण्ड स्वीकृत गर्ने लगायतका महत्त्वपूर्ण निर्णयहरू गरेको छ। बैठकका निर्णयबारे जानकारी दिँदै सरकारका प्रवक्ता तथा आन्तरिक मामिला तथा कानुन मन्त्री इन्द्रमणि पराजुलीले विभिन्न प्रशासनिक र कानुनी प्रक्रिया अगाडि बढाइएको बताए।

मन्त्रिपरिषद्को निर्णय अनुसार प्रदेश लोकसेवा आयोगको रिक्त प्रदेश सचिव पदमा आन्तरिक मामिला तथा कानुन मन्त्रालयका सचिव आसमान तामाङलाई खटाउने निर्णय गरिएको छ। तामाङको ठाउँमा आन्तरिक मामिला तथा कानुन मन्त्रालयको प्रदेश सचिवको रूपमा सह–सचिव कृष्णप्रसाद सापकोटालाई पदस्थापन गरिएको प्रवक्ताले बताए।