कर्णालीमा उपनिर्वाचन नतिजा : माओवादीलाई बोनस, कांग्रेसलाई घाटा !

सुर्खेत । कर्णालीका विभिन्न ८ स्थानीय तहमा भएको उपनिर्वाचन सम्पन्न भएको छ । यहाँ एक उपप्रमुख, एक गाउँपालिका अध्यक्ष, एक उपाध्यक्ष र ५ वडाध्यक्ष पदमा उपनिर्वाचन भएको थियो । ८ पदका लागि ४३ जना उम्मेदवार प्रतिस्पर्धामा थिए । जसमध्ये यहाँ ठुला दलहरु नेपाली कांग्रेस, नेकपा एमाले र नेकपा (माओवादी) केन्द्रबिच नै प्रतिस्पर्धा भयो । ०७९ मा कांग्रेसले जितेका ३, माओवादीले जितेको ३ र एमालेले जितेका दुई ठाउँमा उपनिर्वाचन भएको थियो ।

उपनिर्वाचनमा अरु ठाउँमा दलहरु एक्लाएक्लै चुनावी मैदानमा भएपनि रुकुमको सानीभेरीमा कांग्रेस, एमाले, एकीकृत समाजवादी गरी तीन दल माओवादीविरुद्ध गठबन्धनमा थिए भने दैलेख महावुमा एमालेलाई समाजवादीले समर्थन गरेको थियो । उपनिर्वाचनको नतिजा अनुसार कांग्रेसलाई घाटा भएको छ भने सबैभन्दा बढी फाइदा माओवादीलाई भएको छ । माओवादीले ०७९ मा जितेका एक उपाध्यक्ष र दुई वडामा उपनिर्वाचन भएको थियो । अहिले एउटा वडा गुमाएपनि एक उपप्रमुख, एक उपाध्यक्ष र अर्को एमालेबाट एउटा वडा खोसेर विरासत जोगायो ।