कहाँ पुग्यो बोराभित्र मृत फेला परेकी रमा हत्या प्रकरणको अनुसन्धान ?

काठमाडौँ । झापाको दमक नगरपालिका–८ निवासी २१ वर्षीया रोमा भनिने रमा तिवारीको हत्या प्रकरणमा अनुसन्धान गरिरहेको प्रहरी अझै स्पष्ट निष्कर्षमा पुग्न सकेको छैन। घटनाको पाँच दिन बितिसक्दा पनि हत्या कहाँ, कसरी र कसले गर्‍यो भन्ने मुख्य प्रश्नको उत्तर प्रहरीले फेला पार्न सकेको छैन। यद्यपि, घटनाको प्रकृति, भेटिएका प्रमाण र प्रारम्भिक अनुसन्धानका आधारमा प्रहरीले हत्या अन्यत्रै गरेर शव रतुवा खोलामा ल्याएर फालिएको निष्कर्ष निकालेको छ।

गत जेठ १६ गते शनिबार बिहान मोरङ–झापा सीमास्थित सेतुमाडी क्षेत्रको रतुवा खोलामा प्लास्टिकको बोराभित्र पोको पारिएको अवस्थामा एक युवतीको शव फेला परेको थियो। स्थानीयले खोलामा शङ्कास्पद वस्तु देखेपछि प्रहरीलाई खबर गरेका थिए। त्यसपछि घटनास्थल पुगेको प्रहरी टोलीले बोराभित्र रहेको शव निकालेको थियो। प्रारम्भिक पहिचान हुन नसकेको उक्त शव पछि दमक–८ की रमा तिवारीको रहेको पुष्टि भएको थियो।