जेलबाट उपचार गर्न निस्केका कैदी सिधै होटलमा, प्रहरीकै पहरामा बियर र युवतीसँग मस्ती !

केन्द्रीय कारागार सुन्धाराबाट उपचारका लागि अस्पताल लैजाने क्रममा एक कैदीलाई होटलमा लगेर महिलासँग भेटघाट गराउन र हत्कडीसमेत खोलिदिएको घटनामा संलग्न दुई प्रहरी कर्मचारीलाई सेवाबाट हटाइएको छ ।

छानबिनबाट कैदी अनुप भण्डारी अस्पताल जानुको सट्टा सामाखुसीस्थित एक होटलमा करिब तीन घण्टा बसेको खुलेपछि प्रहरीमाथि विभागीय कारबाही गरिएको हो ।

ठगी मुद्दामा सजाय भुक्तान गरिरहेका कैदी अनुप भण्डारीलाई गत जेठ १ गते ढाडसम्बन्धी समस्याको उपचारका लागि सामाखुसीस्थित विनायक अस्पताल तथा प्रसूति गृह लैजान अनुमति दिइएको थियो । उपचारका लागि उनलाई सरकारी सवारीसाधनमार्फत सुरक्षासहित अस्पताल लैजाने व्यवस्था गरिएको थियो ।

तर, काठमाडौं उपत्यका प्रहरी कार्यालयले गठन गरेको छानबिन समितिको प्रतिवेदनअनुसार भण्डारी अस्पताल नगई सामाखुसीस्थित होटल दीपसागर पुगेका थिए । उनी होटलको ५०२ नम्बर कोठामा एक महिलासँग करिब तीन घण्टा बसेको पाइएको छ ।

छानबिनबाट होटलमा रहँदा बियर तथा अन्य पेय पदार्थ मगाइएको र सुरक्षाका लागि खटिएका प्रहरी कर्मचारीहरू पनि घटनाबारे जानकार रहेको खुलेको छ ।

घटनाका बेला प्रहरी सहायक हवल्दार होमबहादुर कुँवर र प्रहरी जवान टेकबहादुर विक कैदीको सुरक्षामा खटिएका थिए । छानबिन समितिले उनीहरूले कैदीलाई होटल जान नरोकेको, होटलसम्म पुर्‍याएको तथा हत्कडीसमेत खोलेको निष्कर्ष निकालेको छ ।

समितिसमक्ष दिएको बयानमा दुवै प्रहरीले चिकित्सक अपराह्न ५ बजे मात्र उपलब्ध हुने जानकारी पाएपछि कैदीलाई केही समय अन्यत्र राखिएको बताएका छन् । उनीहरूले कैदीको हत्कडी खोलिएको तथा एक महिलासँग भेट गराइएको तथ्य पनि स्वीकार गरेका छन् ।

होटलका प्रबन्धक किसान गुरुङले पनि बयानका क्रममा दुई जना बर्दीधारी प्रहरी, एक कैदी र एक महिला होटलमा आएको तथा उनीहरू केही घण्टा बसेर फर्किएको बताएका छन् ।

घटनाको छानबिनका लागि एसपी नरहरि रेग्मीको नेतृत्वमा समिति गठन गरिएको थियो । समितिले प्रहरी कर्मचारीहरूको कार्यलाई जिम्मेवारीविपरीत र प्रहरी आचरणविपरीत ठहर गर्दै विभागीय कारबाहीको सिफारिस गरेको थियो ।

सिफारिसका आधारमा सहायक हवल्दार कुँवर र जवान विकलाई जेठ ११ गतेदेखि भविष्यमा सरकारी सेवाका लागि अयोग्य नठहरिने गरी प्रहरी सेवाबाट हटाउने निर्णय गरिएको प्रहरीले जनाएको छ ।

घटनापछि कारागार सुरक्षा व्यवस्थापन, कैदीबन्दीलाई उपचारका लागि बाहिर लैजाँदा अपनाइने निगरानी प्रणाली तथा जिम्मेवारी वहन गर्ने निकायहरूको भूमिकाबारे पनि प्रश्न उठेको छ ।

यद्यपि छानबिन प्रतिवेदनमा सुरक्षा नेतृत्व तहको भूमिकाबारे स्पष्ट निष्कर्ष उल्लेख गरिएको छैन । यस घटनाले कारागार प्रशासन र सुरक्षा निकायले कैदीबन्दीको उपचार तथा बाह्य आवतजावतसम्बन्धी व्यवस्थामा अपनाउने निगरानी प्रणालीको प्रभावकारितामाथि प्रश्न खडा गरेको छ ।

भिडियो सामग्री :