नेपाल एयरलाइन्सको सञ्चालक नियुक्तिमा चलखेल गरेको भन्दै प्रधानमन्त्री कार्यालयमा उजुरी

काठमाडौं । नेपाल एयरलाइन्सको सञ्चालक समिति सदस्य नियुक्ति प्रक्रिया विवादमा परेको छ। सञ्चालक नियुक्तिमा चलखेल भएको भन्दै प्रधानमन्त्री तथा मन्त्रिपरिषद्को कार्यालयमा उजुरी परेपछि नियुक्ति विवाद बाहिर आएको हो ।

संस्कृति, पर्यटन तथा नागरिक उड्डयन मन्त्रालयले वैशाख ३१ गते पाँच जनालाई सञ्चालक सदस्यमा नियुक्त गर्ने निर्णय गरेपछि त्यसबारे प्रश्न उठ्न थालेको हो । मन्त्रालयको निर्णयअनुसार कास्कीका डा. दीपक प्रसाद बास्तोला, चितवनका प्रविन भट्टराई, ललितपुरका महेश्वर भक्त श्रेष्ठ, काठमाडौंकी रुपा लामिछाने र स्याङ्जाका लिलाराज ढकाललाई सञ्चालक समितिमा नियुक्त गरिएको थियो। उक्त निर्णय विभागीय मन्त्री खड्गराज पौडेलको मन्त्रीस्तरीय निर्णयमार्फत भएको बताइएको छ ।