शान्तिको प्रतीक्षा

चार महिनादेखि पश्चिम एसियालाई युद्ध, अस्थिरता र ऊर्जा संकटको भुमरीमा फसाएको अमेरिका–इरान द्वन्द्व अन्ततः वार्ताको दिशातर्फ मोडिएको छ। पाकिस्तानको मध्यस्थतामा भएको प्रारम्भिक समझदारी र स्विट्जरल्यान्डमा हुने औपचारिक हस्ताक्षरको तयारीले विश्व राजनीतिमा एउटा महत्त्वपूर्ण मोड ल्याएको छ। युद्धविरामलाई थप ६० दिन लम्ब्याउने, हर्मुज जलडमरू पुनः सञ्चालनमा ल्याउने तथा इरानको आणविक कार्यक्रमसम्बन्धी विवादलाई वार्तामार्फत समाधान खोज्ने सहमतिले तत्कालका लागि युद्ध रोक्ने आधार तयार गरेको छ। यो युद्ध अन्त्यको घोषणा मात्र होइन, शान्तिको सम्भावनाको प्रारम्भ पनि हो। आगामी दिनमा हुने वार्ता र छलफल कसरी अघि बढ्छ भन्ने प्रतीक्षामा यति बेला अमेरिका–इरान मात्र होइन, विश्व नै छ।

विश्लेषकहरूले युद्ध सुरु हुँदा यसले सम्पूर्ण पश्चिम एसियालाई क्षेत्रीय युद्धतर्फ धकेल्न सक्ने चेतावनी दिएका थिए। अमेरिका, इरान, इजरायल, लेबनान र खाडी मुलुकहरू प्रत्यक्ष वा अप्रत्यक्ष रूपमा संलग्न हुँदा विश्व नै चिन्तित बनेको थियो। हजारौं मानिसले ज्यान गुमाए, लाखौं विस्थापित भए र विश्व ऊर्जा आपूर्तिमा गम्भीर संकट उत्पन्न भयो। हेर्दा दुई देशबिचको समस्या जस्तो देखिए पनि त्यसको प्रभाव संसारको कुना कुनासम्म परेको थियो। यस्तो अवस्थामा युद्धविरामको सहमति आफैंमा सकारात्मक उपलब्धि हो। यसले सैन्य शक्तिभन्दा कूटनीति र संवाद अन्ततः बढी प्रभावकारी माध्यम हुन सक्छ भन्ने तथ्य पुनः स्थापित गरेको छ।