नीतिगत स्थायित्वका लागि पत्रकारिता जाग्नुपर्छ

नेपाल र विश्वकै परिदृश्य हेर्ने हो भने मिडियाहरू संक्रमणको स्थितिबाट गुज्रेका छन् । पहिलेका मान्यता र परिभाषाहरू ‘रिडिफाइन’ हुने फेजमा छन् । अहिलेको सन्दर्भमा ‘मेनस्ट्रिम’ कसलाई भन्नेमै अन्योल छ । स्मार्टफोनको जमानामा रातोपाटी हेर्ने मान्छेले त्यही मोबाइलबाट न्युयोर्क टाइम्स पनि हेरेको होला, अर्को कुनै सञ्चारमाध्यम हेर्नेले वासिङ्टन पोस्ट पनि हेरेको होला, ध्रुव राठीको ब्लग पनि हेरेकै होला । त्यसकारण अहिले को–सँग कसको प्रतिस्पर्धा भन्ने कुराहरू नै ‘ब्लर’ हुँदै गएको अवस्था छ ।

पत्रकारिता रिडिफाइन हुने क्रममा रहेकाले यसले कस्तोखालको आकार लिन्छ या कुन चिज मेनस्ट्रिम हुन्छ भन्नेकुरा अहिले यसै भन्न सकिने अवस्था छैन ।