इबोला भाइरस : सुरक्षा सतर्कता जरुरी

विश्व स्वास्थ्य क्षेत्रले सामना गरेका सबैभन्दा घातक संक्रामक रोगमध्ये इबोला भाइरस रोग पनि एक हो । यो रोग दुर्लभ भए पनि अत्यन्त खतरनाक मानिन्छ । संक्रमित व्यक्तिको मृत्यु हुने सम्भावना धेरै हुने भएकाले विश्व स्वास्थ्य संगठन (डब्लुएचओ) ले यसलाई उच्च जोखिमयुक्त महामारीजन्य रोगको सूचीमा राखेको छ ।

इबोला भाइरस पहिलोपटक सन् १९७६ मा अफ्रिकी मुलुक सुडान र तत्कालीन जाइर (हालको डेमोक्रेटिक रिपब्लिक अफ कंगो) मा देखिएको थियो । कंगोको इबोला नदीको नजिक प्रकोप फैलिएकाले यसको नाम इबोला राखिएको हो । त्यसयता अफ्रिकाका विभिन्न मुलुकमा पटक–पटक महामारी फैलिएको छ । विशेष गरी सन् २०१४–२०१६ को पश्चिम अफ्रिकी प्रकोपले विश्वलाई ठूलो त्रासमा पारेको थियो । हजारौं मानिसको मृत्यु भएपछि विश्व समुदायले महामारी नियन्त्रण प्रणालीलाई थप मजबुत बनाउनुपर्ने आवश्यकता महसुस गरेको थियो ।