अविश्रान्त योद्धा गणेशमान

आज असोज २ गते । २०४६ सालको जनआन्दोलनका सर्वोच्च कमान्डर गणेशमान सिंहको स्मृति दिवस । नेपाली कांग्रेसका ’चार तारा’मध्येका एक गणेशमान सिंहलाई सम्झने र श्रद्धाञ्जली अर्पण गर्ने कर्मकाण्ड कांग्रेसले त पूरा गर्ने नै छ, उहाँलाई अन्य कैयन अस्वाभाविक पात्रहरूले पनि सम्झने पक्का छ ।

राणाकालमा नै ‘मिथकीय’ पात्र बनेका गणेशमान सिंहका अनेकन कथा आजका पुस्ताका लागि दन्त्यकथा लाग्न सक्छ । राणाको जेलको दुर्भेद्य मानिएको जेलको पर्खाल नाघ्नु, त्यसपछिको रोमाञ्चक पैदल यात्रापश्चात् भारत पलायन, बीपी कोइरालासँगको भेट, नेपाली कांग्रेसको स्थापना र पुनः गिरफ्तारीका कथा आजका पुस्ताका लागि कुनै सनसनीपूर्ण चलचित्रझैं लाग्न सक्छ । २००७ सालको घोषणापश्चात् रिहाइ अनि सिधै मन्त्री पद र मन्त्री हुँदाकै बखतका अनेकन गाथा आफ्नै ठाउँमा छन् ।