सोहोर्दै र सम्हाल्दै प्रधानमन्त्री प्रचण्ड

उता, भारतीय जनता पार्टीका नेता नरेन्द्र दामोदरदास मोदी आज तेस्रोपटक भारतका प्रधानमन्त्रीका रूपमा शपथग्रहण गर्दै हुनुहुन्छ भने यता नेपाल कम्युनिस्ट पार्टी (एकीकृत माक्र्सवादी–लेनिनवादी) का अध्यक्ष केपी शर्मा ओली चितवन पुगेर श्रीरामको जन्म चितवनको अयोध्यापुरीमा भएको शंखनाद गर्दै हुनुहुन्छ । नरेन्द्र मोदीले अयोध्यामा राम मन्दिरको निर्माण गराउनुभयो । अयोध्या नगरलाई झकिझकाउ तुल्याउनुभयो । संसारभरिका रामभक्तहरूको सुविधाका लागि उत्तर प्रदेश, भारतको सानो शहर अयोध्यामा अन्तर्राष्ट्रिय विमानस्थल बनाउनुभयो । तर, भारतीय जनता पार्टीले त्यहीँ पराजय बेहोर्नुप¥यो । यो खतरनाक संकेत थियो भारतीय राजनीतिमा ।

यता, नेपालमा कामरेड केपी ओली विगत केही समयदेखि चितवनको अयोध्यापुरीलाई राम जन्मभूमि बताउँदै आउनुभएको छ । उहाँले आफनो आत्मपरक शोधका आधारमा भन्नुभएको छ– भगवान् राम सीतासँग बिहे गर्न अयोध्यापुरीबाट जन्ती लिएर मिथिला नगरी जनकपुर पुग्नुभएको थियो । त्यहाँ पुगेर रामजीले शिवजीको धनुष भाँच्नु भएको थियो ।