युगकविको आँगनमा अक्षरहरूको उत्सव : कविताको लयमा झुम्यो ओखलढुङ्गा

ओखलढुङ्गा : युगकवि सिद्धिचरण श्रेष्ठले कुनै समय सिर्जनाको रोमाञ्चकतामा टहलिँदै रचेको ‘मेरो प्यारो ओखलढुङ्गा’ गीतमा भनेझैं यो सुवासिलो माटोमा यस पटक पुनः कविताका अक्षरहरू ब्युँझिएका छन् । भावनाका अजश्र लहरहरू पग्लिएका छन् । सिङ्गो ओखलढुङ्गा कविताको एउटा उत्सवमय लयमा झुमेको छ । बहाना निकै गरिमामय र ऐतिहासिक थियो–युगकवि श्रेष्ठको ११५ औं जन्मजयन्ती ।

यसै अवसरलाई साक्षी राखेर सर्जक चौतारी ओखलढुङ्गा र सिद्धिचरण सङ्ग्रहालय समितिको आयोजना तथा सिद्धिचरण नगरपालिका र जिल्ला समन्वय समिति, ओखलढुङ्गाको आर्थिक सहयोगमा सम्पन्न ’खुला कविता प्रतियोगिता–२०८३ तथा कविता उत्सव’ ले यस ऐतिहासिक भूगोललाई केवल एउटा पहाडी जिल्ला मात्र रहन दिएन, केही दिनका लागि देशकै साहित्यिक राजधानी जस्तै जीवन्त र ऊर्जाशील बनाइ दियो ।