विदेशीबाट सम्बन्धन लिएका कलेज नियमन गर्न नियमावली ल्याउँदै छौँँ : शिक्षामन्त्री

काठमाडौं । शिक्षा तथा खेलकुदमन्त्री सस्मित पोखरेलले विदेशी विश्वविद्यालयसँग सम्बन्धन लिएका क्याम्पसलाई नियमन गर्न नयाँ नियामावली ल्याउन लागिएको बताएका छन् । आइतबार (जेठ १०) आयोजित एक कार्यक्रममा उनले विदेशी विश्वविद्यालयसम्बद्ध कलेजका सन्दर्भमा धेरै गुनासो आएकाले नियमनका निम्ति नियमावली ल्याउन लागिएको जानकारी दिएका हुन् ।

उनका अनुसार, शिक्षाले नियमावलीको मस्यौदा तयार गरी अर्थ र कानुन मन्त्रालयमा पठाएको छ । ती मन्त्रालयको स्वीकृति र रायपछि मन्त्रिपरिषद्मा पेस गरिने उनले बताए । विदेशी विश्वविद्यालयसँग सम्बन्धन लिएका कलेजहरू प्रभावकारी रूपमा नियमन हुन नसकेको उनको भनाइ थियो ।