आँधीखोला उत्खनन्मा वालिङलाई प्रशासनको रोक

स्याङ्जा । वालिङ नगरपालिकाले आफ्नो क्षेत्रमा पर्ने आँधीखोला अस्वाभाविक रूपले उत्खनन् गर्न थालेपछि जिल्ला प्रशासनले रोक लगाएको छ । जिल्ला प्रशासन कार्यालय स्याङ्जाले एकपत्र जारी गर्दै आँधीखोलाको वातावरणीय परीक्षण मूल्यांकन नगरी उत्खनन् नगर्न अनुरोध गरेको छ ।

वालिङ नगरपालिकाले भुम्रे—अर्चबोट—तमादी—डुम्रेभन्ज्याङ्—बोनीडाँडा हँुदै सेतीवेणी गुल्मी सडक निर्माणका लागि चाहिने निर्माण सामग्री उत्खनन् गर्न दिने अनुमति निर्माण कम्पनीलाई दिएको थियो । सो सडक टुनी आरएस जेभी जडीबुटी निर्माण कम्पनी काठमाडौंले निर्माण गरिरहेको छ । त्यसको सहजीकरणमा सहयोग गर्न नगरपालिकाले जिल्ला प्रशासन कार्यालयलाई पत्र पठाएको थियो । तर, जिल्ला प्रशासनले ईआईए नगरी आँधीखोलामा डोजर प्रयोग नगर्न अनुरोध गरेपछि आँधीखोला उत्खनन्मा रोक लगाइदिएको हो ।