६० अर्ब ६० करोडको वैदेशिक लगानी प्रतिबद्धता

काठमाडौं । चालू आर्थिक वर्ष (आव) २०८१–८२ को चैतसम्ममा नेपालले दुई खर्ब २१ अर्ब रुपैयाँ वैदेशिक सहायता प्रतिबद्धता प्राप्त गरेको छ । अर्थ मन्त्रालयका अनुसार गत आवमा वैदेशिक सहायता १ खर्ब २ अर्ब रुपैयाँ मात्र थियो । यहीबीचमा नेपालले साढे ६० अर्ब रुपैयाँ बढीको विदेशी लगानी प्रतिबद्धता प्राप्त गरेको छ ।

चालू आर्थिक वर्ष २०८१–८२ को जेठसम्ममा ६० अर्ब ६० करोड रुपैयाँबराबरको प्रत्यक्ष वैदेशिक लगानीको प्रतिबद्धता आएको उद्योग विभागले जनाएको छ । सरकारले विदेशी लगानीकर्तालाई आकर्षित गर्न नीतिगत सुधार गरेपछि गत आर्थिक वर्ष २०८०–८१ को तुलनामा करिब १० अर्ब रुपैयाँ विदेशी लगानी प्रतिबद्धता बढेको छ ।