धान रोपाइँको मुखैमा युरिया अभाव

स्याङ्जा । मनसुन सक्रिय भएसँगै धान रोपाइँको तयारी तीव्र बनेको बेला स्याङ्जा जिल्लामा रासायनिक मल, विशेष गरी युरियाको अभाव देखिन थालेको छ । धान रोपाइँ शुरु हुनै लाग्दा किसानले आवश्यक मात्रामा मल नपाएको गुनासो गर्न थालेका छन् भने सम्बन्धित निकायले माग अत्यधिक बढेका कारण आपूर्तिमा केही दबाब परेको स्वीकार गरेका छन् ।

पछिल्लो एक दशकयता जिल्लामा गहुँ खेती घट्दै जाँदा बर्खे धान र मकै खेतीको क्षेत्रफल विस्तार भएको छ । यससँगै युरिया मलको माग पनि उल्लेख्य रुपमा बढेको कृषि क्षेत्रका सरोकारवालाहरु बताउँछन् ।कृषि सामग्री कम्पनी लिमिटेड स्याङ्जाका कार्यालय प्रमुख खेमराज भुसालका अनुसार चालू आर्थिक वर्षको जेठ २५ गतेसम्म कम्पनीले ९ सय ६० मेट्रिक टन युरिया, ४ सय मेट्रिक टन डीएपी र ४० मेट्रिक टन पोटास बिक्री गरिसकेको छ ।