बीवाइडी एटो थ्रीमा ब्याट्रीकै कारण आगलागी नभएको साइमेक्सको दाबी

काठमाडौं- साइमेक्स इंकले मोरङको पथरीमा भएको BYD Atto 3 आगलागी घटनामा ब्याट्री वा हाई–भोल्टेज प्रणाली जिम्मेवार नरहेको दाबी गरेको छ ।

नेपालका लागि BYD को आधिकारिक वितरक साइमेक्सले विज्ञप्ति जारी गर्दै बीवाइडी मुख्यालयका इन्जिनियरहरूको सहयोगमा गरिएको अनुसन्धानमा ब्लेड ब्याट्री र पावरट्रेन सुरक्षित फेला परेको जनाएको हो ।

कम्पनीका अनुसार प्रारम्भिक अनुसन्धानले बाह्य आगोको स्रोत नै घटनाको मुख्य कारण भएको संकेत गरेको छ । सजिलै आगो समात्ने सामग्री, जस्तै सुक्खा पात वा अन्य सजावटी वस्तुबाट आगो सुरु भएको हुनसक्ने कम्पनीको निष्कर्ष छ ।

साइमेक्सले गाडीको ब्याट्री प्याकमा कुनै थर्मल रनअवे वा सर्ट सर्किट नभएको स्पष्ट पारेको छ । साथै, आगलागीपछि पनि ब्लेड ब्याट्री सुरक्षित अवस्थामा रहेको दाबी गरिएको छ ।

कम्पनीले बीवाइडीको एलएफपी ब्लेड ब्याट्री विभिन्न सुरक्षा परीक्षणमा सफल भएको उल्लेख गर्दै नेल पेनेट्रेशन, ओभरचार्ज, उच्च तापक्रम तथा क्रस टेस्टहरूमा समेत आगो वा विस्फोट नदेखिएको जनाएको छ ।

साइमेक्सका अनुसार बीवाइडी मुख्यालय र नेपालस्थित सर्भिस इन्जिनियरहरूले गरेको विस्तृत निरीक्षणमा एटो थ्रीको ‘८ इन १’ इलेक्ट्रीक पावरट्रेन पूर्ण रूपमा सुरक्षित भेटिएको र कुनै विद्युतीय खराबी नपाइएको निष्कर्ष निकालिएको छ ।